المفارقة إن محمد صلاح لو جاب جون في أول مباراة ليه مع المنتخب بعد حسام حسن، هيتساوى في قائمة الهدافين التاريخيين لمنتخب مصر مع حسام حسن في المركز الأول، ولو جاب جونين هيتصدر منفردا، واحتمال كبير لفترة طويلة قوي.
حل واحد لوحده قادر على إنقاذ وإنعاش وازدهار صناعة السينما والتليفزيون في مصر.
قفل وحجب IPTV واجراءات حقيقية لمحاربة القرصنة في مصر.
ده لوحده بس هيضاعف بأضعاف مبيعات تذاكر السينما، وعدد المشتركين على المنصات.
طب والغلابة؟ ساعتها هتقدر المنصات - المصرية ويمكن الإقليمية كمان- تنزل سعر الاشتراك بسهولة، لحد ما يبقى في سعر ساندويتشين فول.
ويمكن بالتبعية تتفتح سينمات أكثر بأسعار تذاكر أقل في أماكن مافيهاش سينمات أصلا.
ده هيخلي أفلام أكثر تتعمل، المنتجين يكسبوا أكثر، والمنصات تنتج وتشتري أعمال أكثر، فرص عمل أكثر، الدولة تحصل ضرايب أكثر، وفرص تصدير الأفلام برا تكبر.
قرار محاربة القرصنة مش مشكلة تقنية بالمرة، حلولها موجودة ومعروف بالأسماء من القادر عليها، هي يا إما عدم اهتمام او إهمال أو سبب ثاني له أبعاد مش معلنة.
لو الفنانين والمنتجين محتاجين ينقذوا صناعتهم ويحموا أكل عيشهم أعتقد ديه أول خطوة محتاجين يتكاتفوا وراها، في رأيي ديه أولوية أولى وفي أهمية حق الأداء العلني وحق المنتج في تقليل التكاليف.
هل من مستجيب؟
لما الفن يقدر ينقذ إقتصاد دولة. قصة حقيقية. والله.
في بلد كانت خارجة من عقود من حالة طوارئ، وعاشت حروب وتهديدات أمنية، عندها أزمات اقتصادية، رئيسها شاف فيلم أمريكاني واحد بيحقق إيرادات تعادل تصدير مليون ونص عربية من صناعة بلده.
الرئيس قرر إن الفن مش مجرد ترفيه، ده صناعة ممكن تصدرها للعالم، حتى لو بلدك لغتها مش منتشرة، وحتى لو العالم كله مش مهتم بثقافتك.
بدأت الدولة تدعم صناعة السينما والموسيقى والمسلسلات، وتشجع الاستثمار فيها وتتعامل معاها باعتبارها صناعة حقيقية.
بعد حوالي ثلاثة عقود، أفلامها ومسلسلاتها وموسيقاها غزت العالم، وبالتبعية العالم كله اتعرف على ثقافتها، وعلى أكلها ولبسها ولغتها، وبقت الثقافة نفسها وسيلة لتسويق منتجات البلد وصناعاتها.
البلد دي هي كوريا الجنوبية.
القيادات في كوريا فهموا إن الفن مش مجرد حاجة بتصرف عليها الدولة، ده حاجة ممكن الدولة تكسب منها مليارات.
والنهارده كوريا واحدة من أهم اقتصادات العالم، وقوتها الثقافية بقت جزء من قوتها الاقتصادية.
هتقول إحنا فين وكوريا فين؟
في يوم من الأيام، مصر وكوريا كانوا بلدين عندهم تحديات سياسية و اجتماعية واقتصادية كبيرة، لكن مصر كان عندها ميزة كوريا ماكانتش عندها: صناعة سينما وموسيقى رائدة في منطقتها، وثقافة بتوصل لملايين البشر خارج حدودها.
لكن دلوقتي فعلًا، إحنا فين وهم فين.
I really enjoyed being part of the "Art vs. The Machine" panel at Cairo Khayal Show. An amazing crowd and an impressive show.
📸 Photos courtesy of CairoScene
@CairoScene
7
3,235
ايه هي المفاجأة؟ مفاجأة في الحياة أو السياسة أو الفن أو الكورة أو غيره؟ إن المدعوم أقل يكسب المدعوم أكثر.
إن الفقير المدعوم أقل ينجح في الحياة أكثر من إبن الناس المدعوم من أهلة بتعليم محترم وشبكة أمان تحتيه.
إن الناس في أمريكا مثلا تنتخب الطرف المدعوم أقل بالفلوس أو اللوبيهات أو الإعلام.
إن المشروع الفني المدعوم أقل يعجب الناس أكثر من المدعوم بميزانية ودعاية وتوزيع ونجوم.
إن الفريق المدعوم أقل يكسب فريق معاه فلوس وسكواد ورهبة من الحكام والمنظومة والإعلام.
كل ديه أمثلة تشبه قصة الأطفال الشهيرة لسباق الأرنب والسلحفاة.
لكن الحقيقة إن كل مفاجأة كل ما تبحث فيها تلاقيها مش مفاجأة قوي، وإن السلحفاة مش سلحفاة، هي مجرد أرنب شكله مدي على سلحفاة.
الدعم اللي جاي من براك عامل مساعد، بس مستحيل يخليك "عايز" أكثر، يخليك فنان أكثر، يخليك طموح أكثر، يخليك مجتهد أكثر، يخلي عندك حمية أكثر.
إنت مش بتختار ظروفك، بس بتختار طريقة تفكيرك، مقدار مجهودك، وأسلوبك، مش شرط هتكسب قدام الدعم لمنافسيك، بالعكس هتخسر كثير…
بس بتزود فرصك إنك في يوم تعمل مفاجأة.
بمناسبة الاحتفاء بلاعب الزمالك أحمد صفوت، كل ما بشوف لاعب ناشئ زملكاوي مميز، أفرح قيراط وأخاف ٢٤.
وللتوضيح ال ٢٤ خوف هم:
- يروح الأهلي.
- يحبط من عدم الاهتمام.
- يروح الأهلي.
- سوء التأهيب والتأهيل البدني.
- يروح الأهلي.
- مايقبضش فيلغي عقده.
- يروح الأهلي.
- يحترف لنادي مجهول يدفنه.
- يروح الأهلي.
- عدم الالتزام والسهر والبنات.
- يروح الأهلي.
- يتجنن ويختل عقليا.
- يروح الأهلي.
- مايلعبش ويفضل على الدكة لحد ما يصدي.
- يروح الأهلي.
- الإصابات.
- يروح الأهلي.
- يتألق ويتظلم ومايتاخدش المنتخب علشان زملكاوي.
- يروح الأهلي.
- يطلع في برنامج مقالب يهزء نفسه.
- يروح الأهلي.
- يروح بيراميدز.
- يروح الأهلي.
وأخيرا…
- يروح الأهلي.
لا ترى كل من حولك كمتآمرين عليك، لا ترى كل عقبة كمعركة، لا ترى الدنيا كحرب، لأنك لو عملت كده، مهما عرفت ناس هتحولهم لأعداء، مهما أنجزت هتتاجم، ومهما نجحت هتحفر قبرك بنفسك.
نتايج الانتخابات الأمريكية والاسرائيلية تاريخية لأسباب كثير، السؤال الأهم، نتنياهو هيحاول يعمل إيه قبل ما تتشكل حكومة من غيره، وترامب هيحاول يعمل ايه قبل ما الديموقراطيين ياخدوا كراسيهم؟ تراجع أم تحرك عنيف مجنون أخير؟
نتنياهو خسر الأغلبية، وترامب بيخسر مجلسَي النواب والشيوخ، وكل ده من توابع اللي بيحصل في الشرق الأوسط.
منطقتنا، على قد ما هي ملعونة بالحروب والصراعات، دايمًا قادرة تغيّر العالم.
وواجب علينا نفضل متمسكين بالأمل إن اللي بيحصل دلوقتي تغيير للأفضل… أو على الأقل للأقل سوءًا.
غريب قوي موضوع إن أمريكا تعلن عن إنها هتضرب إيران يوم ٤ نوفمبر، مفكرني بإفيه مسرحية الهمجي "هعملكوا امتحان مفاجئ على غفلة.. يوم السبت إن شاء الله"
أثبت بالتجربة:
الفرق المصرية مش محتاجة مدرب شديد وحازم وقاسي، ولا الأهم يكون صاحب فكر وتكتيكات معقدة.
الأندية المصرية دلوقتي محتاجة مدرب أقرب للطبيب النفسي.
يعرف يدي دوافع ويجددها ويتعامل مع إيجو النجوم المتضخم ويحتوي نقاط ضعفهم النفسية.
هتعمل ديكتاتور على نجوم هيفشلوك، هتعمل خطط عبقرية هتلخبطهم، الشاطر اللي يحمس ويحتوي ثم يأتي التكتيك والخطط وخلافه.