مــــدN❗ يــــة

بلاقي البوست دا دايما بأشكال متعددة والطرح دا غبي جدا على كذا مستوى. اولاً هو جهل وغباء بالدول الغربية نفسها وشروطها ، هما مش مهتمين افكارك السياسية اية ويجوا يقولوا ليك اية دا انت ازاي تقدمي كدا ، اية دا يا اخواتي جان بول سارتر بعث من جديد أتفضل الفيزا احنا محتاجين افكارك التنويرية العظيمة دي ، بابا عاش في اوروبا فترات كان بيحكيلي انه كان بيتعنصر عليه عادي عشان عربي حتى لما يقول انه مسيحي كان بيقولي انت كدا كدا بالنسباله واحد عربي ، هو مش هيأوف أح عليك ويقولك اية دا انت بتشتم الإسلام تعالى اتفضل. هما مهتمين اولا لو انت شاطر وتقدر تفيد المجتمع بحاجة ، عندهم نقص في الدكاترة فأنت دكتور شاطر وقدرت تعمل المعادلة فأنت هتفيد المجتمع كدا ، ثانيا بفلوسك هما مهتمين بحسابك البنكي مش بأفكارك خالص ، سواء تاخد فيزا سياحة فيبقى معاك فلوس تغطي مصاريفك او دراسة ، او مستثمر هتحط فلوس. لكن استماره السفارة مفيهاش موقفك من معضلة الإرادة والمعرفة. كمان هو جهل بطبيعة الدول الرأسمالية الاستعمارية دي كلها أصلا ، وجهل بذاتك حتى انت فاكر نفسك عشان انت بتشتم الدين فأنت كدا بقيت بقى شخص تنويري وذو حيثية في المجتمع وانت مجرد شخص تافه عادي. فينتهى بيك المطاف انك شخص منفصل عن الواقع ، عنده اوهام ، محتقر ذاته ، شبه شخصية فيلم ليلة سقوط بغداد الي كل شوية يقول "والله هينضفونا" ويجرى عليهم يقول حبايبي حبايبي وهما ضربوه برصاصة عشان محتقرينه ومش شايفينه أصلا حاجة.